Жошыбаев ЭКСПО-2017 аясында өтетін халықаралық шараларды атады
«Көрме өтетін кезеңде көптеген халықаралық шаралар ұйымдастырылады. Соның бірі - Шанхай ынтымақтастық ұйымының саммиті. Сонымен қатар біз энергетика және туризм мәселелері бойынша түрлі министрлер деңгейіндегі кездесулерді ұйымдастырмақпыз. Халықаралық әйелдер форумы да өтеді. Ал көрме аяқталуға жақындаған тұста Ислам ынтымақтастық ұйымының ғылым және технология жөніндегі саммитін өткіземіз. Бұл саммит елімізде алғаш рет ұйымдастырылмақ», - деді Жошыбаев.
Сонымен қатар оның атап өтуінше, көрме өтетін кезеңде қатысушы мемлекеттердің ұлттық күндері, тақырыптық шаралар, түрлі мәдени-танымдық және спорттық шаралар да көптеп ұйымдастырылады.
«Бұл мәселелердің барлығын бүгінгі кездесу барысында кеңінен талқыға салатын боламыз», - деді ЭКСПО көрмесінің комиссары Рәпіл Жошыбаев.
Айта кетерлігі, ЭКСПО-2017 халықаралық мамандандырылған көрмесі ағымдағы жылдың 10 маусымында басталып, 10 қыркүйекте аяқталады. Көрмеге 2 миллионнан астам адам келеді деп күтілуде. Олар көрмені кемінде 2 рет аралайды деп жоспарланған. Жалпы көрмені тамашалаушылардың 85 пайызын Қазақстан азаматтары, ал қалған 15 пайызын шетелдіктер құрайды. Шетелдіктердің басым бөлігін ТМД елдерінің және Қытайдың азаматтары құрайды деп күтілуде. Қазіргі уақытта 112 мемлекет пен 18 халықаралық ұйым ЭКСПО көрмесіне қатысатындығын ресми түрде растап отыр.