Жұмыс берушілер қоластындағылардың талабына құлақ түрмейді - Кәсіподақтар федерациясының төрағасы
АСТАНА. KAZINFORM – Халықаралық еңбек ұйымының бас директоры Жильбер Унгбо Қазақстанға алғаш рет ресми сапармен келді. Осы ретте, ҚР Кәсіподақтар федерациясы ғимаратында арнайы жиын ұйымдастырылып, еңбек саласындағы өзекті мәселелер талқыланды. Атап айтсақ, еңбек инспекциясы жүйесін реформалау, жұмыс орындарындағы қауіпсіздікті қамтамасыз ету, жастардың құқықтарын қорғау бойынша ұсыныстар айтылды.
ҚР Кәсіподақтар федерациясының төрағасы Сатыбалды Дәулеталиннің мәліметінше, 2023 жылы елімізде 84 еңбек дау-дамайы тіркелген. Оның 31-і – кәсіподақ ұйымдарына қатысты.
«Айта кету керек, 48 еңбек дауын шешуге Кәсіподақтар федерациясы мен еншілес ұйымдардың өкілдері қатысты. Кәсіподақ ұйымы жоқ 17 кәсіпорынның мәселесі де назардан тыс қалмады. Еңбек жанжалдарының туындауының негізгі факторлары ретінде еңбекақы бойынша проблемалар, жұмыс берушілердің жұмысшылардың талаптарын елемеу фактілері немесе жұмыс берушілердің оларды шешуге мүдделі болмауы, сондай-ақ ұйымдарда кәсіподақтардың болмауын атап өтуге болады. Еңбек жанжалдарының қаупін жедел анықтау үшін Кәсіподақтар федерациясы апта сайын кәсіподақ мониторингін жүргізеді», - деді Сатыбалды Дәулеталин.
Халықаралық еңбек ұйымының бас директоры Жильбер Унгбо өз сөзінде соңғы жылдары Қазақстанның көмірлі шахталарында апатты жағдайлар жиі орын алғанын, бұл ретте, жұмыс орындарындағы қауіпсіздікті қамтамасыз етуге баса мән беру керек екенін атап өтті.
Павлодар қаласы Мұзафар Әлімбаев атындағы ЖОББМ директордың тәрбие жұмыс жөніндегі орынбасары, Кәсіподақ жастар кеңесінің мүшесі Оразбек Бахатхан Кәсіподақтар федерациясы мен оның мүшелік ұйымдары кәсіподақтардың жас мүшелерінің еңбек құқықтары мен әлеуметтік-экономикалық мүдделерін қорғап қана қоймай, сонымен қатар жастарды кәсіподақтардың барлық сатыларына тартуға бағытталған мақсатты жұмыс жүргізіп жатқанын атап өтті.
«Бұл жұмыстардың нәтижесі - республикалық және өңірлік деңгейлерде құрылған жастар кеңестері, жастардың ұжымдық шараларға және дәстүрлі науқандарға тұрақты қатысуы, ұстаздар лагерьлерін өткізу, жас кәсіподақ көшбасшыларын кадр резерві бойынша ілгерілету. Жастар – қоғамның қозғаушы күші, сондықтан жастармен жұмыс - кадр саясатының және кәсіподақ қозғалысын ұйымдастырушылық нығайтудың маңызды бағыттарының бірі болып табылады. Жыл сайын жас кәсіподақ көшбасшыларын дайындауға қойылатын талаптар айтарлықтай артып келеді, бұл XXI ғасырда кәсіподақтардың дамуы мен өзгеруіне жаңа серпін беретіні сөзсіз», - деді ол.
Айта кетейік, ХЕҰ – еңбек қатынастарын реттеумен айналысатын Біріккен Ұлттар Ұйымының мамандандырылған мекемесі. Оның құрамына Қазақстанды қосқанда 187 мемлекет кіреді. Ұйымның негізгі мақсаты – әлеуметтік әділеттілікті қамтамасыз ету.
Ұйым қақтығыстарды шешу және еңбек жағдайларын жақсарту үшін үкіметтер, жұмыс берушілер және жұмысшылар арасындағы диалогты ілгерілететін трипартизм қағидаты бойынша жұмыс істейді.
