Жұмыс берушілер ай сайын төлейтін 3,5 пайыз әлеуметтік сақтандыру не үшін керек

НҰР-СҰЛТАН. ҚазАқпарат – Қазақстанда мемлекеттік әлеуметтік сақтандыру жүйесінде 6,6 млн адам тіркелген, деп хабарлайды ҚазАқпарат тілшісі.

2005 жылдың 1 қаңтарынан бастап Қазақстанда жұмыс істейтін азаматтарды әлеуметтік қорғаудың қосымша тетігі ретінде әлеуметтік сақтандыру жүйесі енгізілді.

Жұмыс берушілер өз қаражаты есебінен М ӘСҚ қорына қызметкердің табысынан 3,5% мөлшерінде әлеуметтік аударым төлеп отыр.

«Бүгінгі таңда елімізде аталған жүйеде 6,6 млн адам сақтандырылған. 2021 жылы 340 млрд теңгеге жуық сомаға 1,1 млн-нан астам адам қордан төлем алды. 2005-2021 жылдар аралығындағы әлеуметтік төлемнің жалпы сомасы - 2,4 трлн теңгені құрап отыр», - деп хабарлады ҚР М ӘСҚ баспасөз қызметі.

Мемлекеттік әлеуметтік сақтандыру жүйесі 6 әлеуметтік тәуекел туындаған жағдайда қолдау көрсетеді, атап айтқанда:

1) еңбекке қабілеттен айырылу;

2) асыраушысынан айырылу;

3) жұмысынан айырылу;

4) жүктілікке және босануға байланысты кірісінен айырылу;

5) жаңа туған баланы (балаларды) асырап алуға байланысты кірісінен айырылу;

6) бала бір жасқа толғанға дейін оның күтіміне байланысты кірісінен айырылу.