Жыл басынан бері мемлекет пайдасына 9,9 млрд. теңге өндірілді - БҚО прокуратурасы

ОРАЛ. ҚазАқпарат - Батыс Қазақстан облысында прокурорлық қадағалау актілері бойынша жыл басынан бері мемлекет пайдасына 9,9 млрд. теңге залал өндірілді.

БҚО прокурорының орынбасары Халидолла Дәуешевтің айтуынша, мысалы, Бөрлі ауданы прокуратурасының аудандық мемлекеттік кірістер басқармасына енгізген ұсынымына сәйкес бес кәсіпорыннан 49,7 млн. теңге салық берешегі өндірілді. Салық берешегін толық көлемде өндіруді қамтамасыз етпегені үшін аталмыш басқарманың лауазымды тұлғалары қатаң тәртіптік жауапкершілікке тартылды.

Сонымен қатар прокуратура органдары уәкілетті мемлекеттік органдар салған әкімшілік айыппұлдың төленуіне ықпал етуде. Соның нәтижесінде 41679 қаулы нақты орындалып, 1,2 млрд. теңгенің бюджетке түсуі қамтамасыз етілді.

Айыппұл өндіру көрсеткіші жоғарылап, 70,3 пайызға жетті. Айталық, Бөрлі ауданы прокуратурасының ұсынымы бойынша аудандық ішкі істер бөлімі ұзақ уақыт бойы төленбеген әкімшілік айыппұлдың төленуі үшін тиісті шараларды алды, соның нәтижесінде бюджетке 1,7 млн. теңге түсті. Сол секілді Тасқала ауданы прокуратурасының ұсынымы бойынша аудандық мемлекеттік кірістер басқармасы «Казтелерадио» АҚ-дан 2,5 млн. теңге өндірді.

Күні бүгін БҚО бойынша экология департаменті (99,9 пайыз), төтенше жағдайлар органдары (89,9 пайыз), орман шаруашылығы және жануарлар әлемі аумақтық инспекциясы (89,8 пайыз) бюджетке қаржы өндірудің жоғары көрсеткішіне қол жеткізсе, ал малдәрігерлік бақылау аумақтық инспекциясы (31,4 пайыз), мемлекеттік кірістер (43 пайыз) және ішкі істер органдары (45 пайыз) бұл жағынан мақтана алмайды.