Жылқыны соққан мотоциклдің жүргізушісі де, жолаушысы да мерт болды
АҚТӨБЕ. ҚазАқпарат - Ақтөбе облысында мотоцикл тізгіндеген жасөспірім мен қасындағы адам жылқыны соғып, өздері мерт болды, деп хабарлайды ҚазАқпарат тілшісі Polisia.kz сайтына сілтеме жасап.
29 тамызда Ақшат ауылының маңындағы Ақтөбе-Солтүстік айналма жолындағы жол апаты екі адамның өліміне себепші болды.
Ақтөбе-Солтүстік айналма жолының шамамен 10-шы шақырымында Ақшат ауылынан Солтүстік айналма көпіріне қарай Yamaha мотоциклімен келе жатқан 17 жастағы бозбала жылқыны соққан. Кәмелеттік жасқа толмағандықтан оның көлік құралын жүргізуге құқы жоқ.
Жол-көлік оқиғасы салдарынан 17 жастағы мотоцикл жүргізушісі мен оның қасындағы 18 жастағы қыз есін жимастан, оқиға орнында көз жұмды.
Полиция департаментінің қызметкерлері қайтыс болған жасөспірімдердің ата-аналарына көңіл айтып, қалың көпшілікке кәмелеттік жасқа толмаған баланы көлік құралына отырғызуға жол беруге болмайтынын және түн ішінде үйде болуын қадағалау керек екенін ескертеді.
