Зика вирусы жұртты әлі қат­ты үрейлендіріп отыр

Әлемді жайлап бара жатқан зика вирусының бір ошағы Брази­лия екені, мұндағы ахуалдың әлі де қауіпті күйінде қалып тұр­ға­ны Олим­пиада қарсаңында жұрт­шы­лықты үрейлендіре бас­тады. Мұның соңы медицина саласындағы 150 сарапшының зика вирусына байланысты Олимпиялық ойындарды басқа қалаға ауыстыру жөнінде хат жазуға ұласты, деп жазады «Егемен Қазақстан» газеті.

Дәрігерлер мәлімдемелерін Дүние­жүзілік денсаулық ұйымы­ның бас директоры Маргарет Чен­нің атына жолдаған. Ғалымдар жаһандық жарысты биыл тоқтатып тастауға шақырып отырған жоқ. Бірақ доданы Риода қалдыруға болмайтынын айтады. Олар тек Бразилияда Ойындар өтіп жатса, бір мезгілде 500 мың шетелдік туристердің зика дертін жұқтырып, өз елдеріне алып кететінін айтып сақтандырады. Егер бұл кесел Африка мен Оңтүстік Азияның кедей елдеріне тарап жатса, ахуалдың күрт нашарлап кететінін атап өтеді. «Ойындар үшін тәуекелге бару адам­гершілікке жатпайды», - деп жазады хат авторлары.

Сарапшылар Рио-де-Жаней­роның аталмыш індеттің көбірек тарау ықтималдылығы жоғары екінші қаласы екеніне де назар аударады. Бұл қаладағы денсаулық сақтау жүйесі нашар. Ал зика басылудың орнына басынып барады, деп атап көрсетеді хат жазушылар. Осыған орай Дүниежүзілік денсаулық сақтау ұйымынан бұл мәселені талдап шешетін тәуелсіз консультациялық топ құруды ұсы­нады.

Айта кетейік, зика ауруы Aedes текті масаның шағуынан тарайды. Оны жұқтырған адамның ыстығы көтеріліп, денесі қышиды, басы ауы­рып, буындары ісіп кетеді.