Ақтөбе облысы Хромтау ауданындағы колледжде білім алып жүрген оқушы оқу жылы басталған кезде оқытушылармен араздасып, ішкі тәртіпке бағындай, директордың алдына барған. Кейін құжаттарын сұрап, оқудан біржола кететінін мәлімдеген оқушының ата-анасы орта арнаулы оқу орнына шақырылды. Осы аралықта оқушы пышақ алып келіп, колледж директоры Бағдашжан Молдашеваны қорқытады. Оқиға орнына полиция қызметкерлері дереу жетіп, ешкім зардап шеккен жоқ. Қазір осы оқиғаға байланысты қылмыстық іс қозғалды.
«Хромтау ауданындағы колледж оқушысы уақытша тергеу изоляторына қамалды. Оның үстінен Қылмыстық кодекстің «Корқыту», «Билік өкіліне қатысты күш қолдану» баптары бойынша тергеу жүріп жатыр», - деді Ақтөбе облыстық ІІД баспасөз жетекшісі Нұргүл Қонақбаева.
Бұған дейін хабарлағанымыздай, облыстық жергілікті полиция қызметінің бастығы Қаныбек Жақсығалиев мектеп, колледж директорларын жинап, сақтық шарасын күшейтуді тапсырған болатын . Жиын кезінде ол Хромтау ауданындағы жасөспірімдер қылмысы 9 есе артқанын жеткізді.