АСТАНА. KAZINFORM — Қазақстанның бірінші, әлемнің 19-ракеткасы Александр Бублик Алматы АТР 250 турнирінің финалына шыға алмады.
Қазақстандық теннисші жартылай финалда әлемнің бесінші, осы жарыстың 1-ракеткасы, ресейлік Даниил Медведевке тап келді.
Бірінші партия 6:3 есебімен Д.Медведевтің пайдасына шешілді. Бұдан кейін А.Бублик матчты жалғастырудан бас тартты.
Небәрі 21 минутқа созылған бәсекеде Бублик 3 эйспен шектелді. Медведев 9 эйс, 1 брейкпен ерекшеленді.
Даниил Медведев финалда рейтингіде 128-орындағы грузиялық Николоз Басилашвилимен чемпиондық атақты сарапқа салады. Ол жартылай финалда әлемнің 39-ракеткасы, грекиялық Стефанос Циципасты қапы қалдырды 6:4, 6:7 (5:7), 6:3.
Өткен жылы Алматыда Д.Медведев чемпион атанған еді.
Еске сала кетейік, бұдан бұрын Алматы турнирінде Бубликтің 2024 жылғы чемпионды жеңіп, жартылай финалға шыққанын жазған едік.
Сондай-ақ Қытайдағы Нинбо турнирінде Елена Рыбакина екінші жыл қатарынан финалға шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).