АСТАНА. KAZINFORM – Қазақстанның екінші, әлемнің 97-ракеткасы Александр Шевченко Братислава (Словакия) челлендер турнирінің жартылай финалына жолдама алды.
Жарыстың 1-ракеткасы болып тіркелген қазақстандық теннисші ширек финалда рейтингіде 312-орындағы чехиялық, 18 жастағы Максим Мрваны сынап көрді.
Тартысты өрбіген бірінші партияда А.Шевченко тай-брейкте таразы басын аудара білді - 7:6 (11:9). Екінші сетте Александр бет қаратпады - 6:0.
Сағат жарымға жуық уақытқа созылған бәсекеде Шевченко 4 эйспен бірге 4 брейк-пойнттан шашау шығарған жоқ. Мрва 1 эйс, 1 брейкпен (6 брейк-пойнт) шектелді.
Александр Шевченконың жартылай финалдағы қарсыласы кейін белгілі болады.
Еске сала кетейік, бұдан бұрын Анна Данилинаның Лондон турнирінің ширек финалына шыққанын жазған едік.
Сондай-ақ Александр Бублик жұптық сында Штутгарт турнирін жеңіспен бастады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).