Әлеуметтік желіде “Алматыдағы ең ескі мектеп”, “ең қорқынышты мектеп” деген атаумен №73 мектеп-гимназиясының фотолары мен бейнежазбасы тарады. Онда Бостандық ауданында орналасқан мектепте жөндеу жұмыстары осы жылдың 2 кварталында басталуы керек екені, бірақ ешқандай жұмыс істелмегені жазылған.
Осыған орай, Kazinform тілшісі Алматы қаласының Білім басқармасына сауалхат жолдады. Басқарма жауабында бүгінгі күні оқу ордасында 1041 бала білім алып, 83 мұғалім сабақ беретіні айтылған.
- №73 мектеп-гимназиясы 1960 жылы салынған. Соңғы рет 1997 жылы жөндеу жұмыстары жүргізілген. Бүгінгі таңда 1041 оқушы білім алады, 83 мұғалім сабақ береді. Жөндеу жұмыстары 2024 жылдың 4 кварталында басталады. Жөндеу жұмыстары кезінде оқушылар №40 жалпы білім беретін мектепте және №146 мектеп-лицейде оқитын болады, - деп хабарлады қалалық Білім басқармасынан.
Еске салайық, бұған дейін Атырауда салынып жатқан 2 жайлы мектептің құрылысынан кемшілік анықталғанын жазған едік.
Сондай-ақ 2025 жылдың соңына дейін заманауи үлгідегі 217 мектеп салынады.