Соңғы бәсекеде әлемнің бесінші, осы жарыстың 1-ракеткасы, ресейлік Даниил Медведев пен рейтингіде 128-орындағы грузиялық Николоз Басилашвилимен чемпиондық атақты сарапқа салды.
Тартысты өткен бірінші партияда тай-брейкте грузиялық спортшының мерейі үстем болды — 7:6 (8:6).
Екіншісінде Медведев артығымен есе қайырды — 6:1.
Үшінші, шешуші сетте ресейлік теннисші 3:1 есебімен алға кетті. Ақыры матчты тағы бір брейкпен түйіндеді — 6:3.
Осылайша, Даниил Медведев Алматыда мықтылығын дәлелдеп, екінші жыл қатарынан чемпион атанды.
Қазақстанның бірінші, әлемнің 19-ракеткасы Александр Бублик жартылай финалда дәл осы Медведевке жол берді.
Жұптық сында үндістандық Юки Бхамбри мен америкалық Райан Сеггерманның бағы жанды.
Финалда үндістандық-америкалық жұп доданың 1-ракеталары, аустриялықтар Лукас Мидлер — Нил Оберлайтнерден айласын асырды — 7:6 (7:3), 6:7 (1:7), 10:2.
Еске сала кетейік, бұдан бұрын Юлия Путинцеваның Токиода негізгі турнирге жолдама алғанын жазған едік.
Сондай-ақ Елена Рыбакина Қытайдағы турнирдің екі дүркін чемпионы атанды.