АСТАНА. KAZINFORM — Қытайдың Шэньчжэнь қаласында 22-27 қыркүйекте өтетін командалық әлем чемпионаты – Билли Джин Кинг кубогының финалдық кезеңіндегі Қазақстан әйелдер құрамасының қарсыласы анықталды.
Қазақстан теннис федерациясынан мәлім еткеніндей, жеребе қорытындысына сәйкес қазақстандықтар ¼ финалда Испания құрамасымен шеберлік байқасады.
Сондай-ақ ширек финалда Италия Қытаймен, Украина Бельгиямен, Чехия Ұлыбританиямен ойнайды.
Әр матч үш ойыннан: екі жекелей және бір жұптық кездесуден тұрады.
Өткен жылы командалық әлем чемпионатында Италия құрамасы үздік шыққан болатын.
Биыл қазақстандық теннисші қыздар сәуірде елордада іріктеу матчында Канаданы 3:1 есебімен ұтып, финалдық кезеңге жолдама алған еді.
Еске сала кетейік, бұдан бұрын Анна Данилинаның Лондон турнирінің ширек финалына шыққанын жазған едік.
Сондай-ақ Александр Бублик Штутгарттағы турнирде германиялық теннисшіден есе қайырды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).