ОРАЛ. ҚазАқпарат – Батыс Қазақстан облысында коронавирус жұқтырған соңғы 6 науқас та Теңіз кен орнынан келген, деп хабарлайды ҚазАқпарат тілшісі.
БҚО әкімдігі мәлім еткеніндей, олардың барлығы да – Теңіз кенішінде жұмыс істейтін облыс тұрғындары.
Атырау облысынан келуіне байланысты карантиндік стационарға жеткізілген. Зертханалық сынама алынғаннан кейін бәрінің коронавирус жұқтырғаны анықталып, облыстық жұқпалы аурулар ауруханасына жатқызылды.
Сырқаттанғандармен қарым-қатынаста болғандар медициналық бақылауға алынып, ауру ошақтарында дезинфекциялық жұмыстар жүргізілді.
Осылайша БҚО-да ауырғандар саны 224-ке жетіп, соның 80-і емделіп шықты. Коронавирус жұқтырғандардың басым көпшілігі – Ресейден келгендер. 27-сі – Теңіз кен орнында жұмыс істейтін өңір тұрғындары.
Еске сала кетейік, бұдан бұрын Батыс Қазақстанда Теңіз кен орнынан келген тағы бір адамнан коронавирус анықталғанын, тағы сегіз адамның емделіп шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).