АСТАНА. KAZINFORM — Футболдан бірінші лига командалары арасында Қазақстан чемпионатының 9-турында Оралдың «Жайығы» Семейде жергілікті «Елім-ай жастарымен» алаңға шықты.
Матч тағдырын бірінші тайм соңында «Жайықтың» ойыншысы Темірлан Үмбетов соққан жалғыз гол шешті.
Осылайша, Вячеслав Невольниковтің шәкірттері қатарынан үшінші бәсекеде жеңіске жетті. Бұдан бұрын 22 мамырда «Жайық» Ақтауда «Каспий жастарын» 1:0 есебімен ұтқан еді. Содан кейін Оралда өз алаңында 27 мамырда аса тартысты ойында «Ақтөбе жастарын» 3:2 есебімен тізе бүктірді.
Қазіргі кезде «Жайық» командасы 15 ұпаймен турнир кестесінде жетінші орында тұр.
Осы турда премьер-лигаға шығуға үміткерлердің бірі – «Тараз» клубы күтпеген жерден өз алаңында «Астана жастарына» есе жіберді – 1:2. Ақтөбелік жастар өз алаңында «Академия Оңтүстіктен» ірі есеппен жеңіліп қалды – 1:4.
Еске сала кетейік, бұдан бұрын «Жайық» футбол клубының жаңа маусымдағы екінші жеңісіне қол жеткізгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).