АСТАНА. KAZINFORM — Қазақстандық теннисші, 16 жастағы Жантөре Санжарұлы жұптық сында Өзбекстанның Әндіжан қаласында жасөспірімдер арасында өткен ITF J30 санатындағы турнирде жеңімпаз атанды.
Жарыстың 2-ракеткасы болып тіркелген қазақстандық теннисші өзбекстандық Никита Гафуровпен бірге өнер көрсетті.
Олар финалда турнирдің бірінші ракеткалары, өзбекстандықтар Сайдумар Саидакбаров пен Ахмаджон Тошмухамедовке тап келді.
Шешуші бәсеке 6:4, 6:3 есебімен қазақстандық-өзбекстандық жұптың пайдасына шешілді.
Осылайша, Жантөре Санжарұлы спорттық жолында алғаш рет жасөспірімдер арасында ITF J30 санатындағы турнирде чемпиондық атаққа қол жеткізді.
Еске сала кетейік, бұдан бұрын АҚШ-та теннистен WTA қорытынды турнирі мәресіне жеткенін жазған едік.
Сондай-ақ Almaty Open алғаш рет ATP 250 санатындағы жылдың үздік турнирі атанды.
WTA рейтингісінде жыл қорытындысы бойынша ТМД өкілдері алғаш рет ТОП-3-ке кірді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).