АСТАНА. ҚазАқпарат - Қазақстандық жас теннисшілер Қырғызстанның Шолпан-Ата қаласында жасөспірімдер арасында өткен ITF Juniors J60 турнирінде табысты өнер көрсетті, деп хабарлайды ҚазАқпарат тілшісі.
Қазақстан теннис федерациясынан мәлім еткеніндей, жұптық сында Іңкәр Дүйсебай мен Дамир Қалдыбеков үздік шығып, чемпион атанды.
Іңкәр ресейлік Екатерина Ходжаевамен бірге финалда қазақстандықтар Әдемі Аманкелді - Сати Әубәкірованы ұтты - 6:2, 7:5.
Дамир ресейлік Макар Кривочехоапен бірге соңғы бәсекеде өзбекстандықтар Ильос Аброров - Бекзод Нематовты қапы қалдырды - 6:3, 3:6, 10:6.
Жекелей сында Жақас Қозыбақ финалға дейін жетіп, жарыстың үшінші ракеткасы, үндістандық Райан Кутхратқа жол берді - 5:7, 1:6.
Қыздар арасында Анастасия Крымкова титул үшін матчта Е.Ходжаевадан ұтылды - 1:6, 4:6.
Еске сала кетейік, бұдан бұрын Елена Рыбакинаның ресми түрде әлемнің үшінші ракеткасы атанғанын жазған болатынбыз.
Сондай-ақ Александр Бублик әлемдік рейтингіде үздік елулікке қайта кірді.
Теннисші Бейбіт Жұқаев Пуэрто-Рикодағы турнирді жеңіспен бастады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).