Орал көшелерінде бүгін жүрудің өзі мұң болды - фоторепортаж
ОРАЛ. KAZINFORM – Орал қаласында 13 ақпанда жауған жаңбырдан кейін көшелерді көк мұз басып, қолайсыз жағдай қалыптасты.
Фото: Ғайсағали Сейтақ/Kazinform
Таңмен қоғамдық көліктер жүрмегендіктен, тұрғындардың қатынауы қиындап кетті. Такси бағасы шарықтап шыға келсе, кей тұрғындар көшеде конькимен жүрген суреті мен видеосын әлеуметтік желіге жүктеп жатты.
Фото: видеодан алынған кадр
Бұл күні қала мектептерінің оқушылары онлайн оқыды.
Фото: Ғайсағали Сейтақ/Kazinform
БҚО төтенше жағдайлар департаментінің мәліметіне қарағанда, мұндай жағдай облысқа тән болып, көптеген бағыттарда жолдар жабылды.
Фото: Әлеуметтік желіден алынды
БҚО денсаулық сақтау басқармасының баспасөз қызметінен мәлім еткеніндей, 13 ақпан күні сағат 08.00-ден 14.00-ге дейін өңірдегі медициналық ұйымдардың травматологиялық пункттерінде түрлі жарақатпен 74 адам түсті.
Фото: Ғайсағали Сейтақ/Kazinform
Солардың ішінде 5 адамға күндізгі стационар, 40 пациентке амбулаторлық ем тағайындалды. 6 адам тәулік бойғы стационарға жатқызылса, 23-і медициналық тексерістен өтуде.
Еске сала кетейік, бұдан бұрын Батыс Қазақстанда ауа райының нашарлауына байланысты 7 жол учаскесі жабылғанын жазған болатынбыз. Оралда көктайғақта мұзға тайып жығылған 156 адам дәрігерге жүгінді.
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).