Облыстың барлық аймағында жалпыхалықтық референдумға қатысу белсенді жалғасып жатыр. Өңірде 435 162 адам дауыс беруге құқылы. 250 учаскенің 238-і халықпен тікелей жұмыс істейді. Ал 12 жабық сайлау учаскесінде ауысым қызметкерлері, тергеу изоляторындағылар, ауруханадағы науқастар дауыс береді.
Өңір басшысы тұрғындарды референдумға қатысып, таңдау жасауға шақырды.
– Бүгін елімізде маңызды, тарихи күн. Жалпыхалықтық референдум Қазақстанның демократиялық даму жолындағы маңызды қадам. Мемлекет басшысы Қасым-Жомарт Тоқаев атап өткендей, дауыс беретін тұрғындар еліміздің қоғамдық өміріндегі үлкен өзгерістерді болжайды, адам құқықтарын алдыңғы орынға қояды, - деді Нұрдәулет Қилыбай.
Еске салсақ, Орталық референдум комиссиясы төрағасының орынбасары Константин Петров елдің барлық өңірінде Қазақстанда атом электр станциясын салу мәселесі бойынша жалпыұлттық референдум басталғанын ресми мәлім етті.
1 шілдедегі жағдай бойынша ел көлемінде 12 176 968 адам референдумда дауыс беруге хақылы.