Мектептегі факультативтерге қатысу міндетті ме

АСТАНА. KAZINFORM — Қазақстан мектептерінде факультатив пәндері бойынша сабақтарға қатысу міндетті. Бұл туралы Оқу-ағарту министрі Жұлдыз Сүлейменова мәлім етті.

Фото: Оқу-ағарту министрлігі

Министрдің айтуынша, гимназиялар мен лицейлерге бөлінген нұсқалық оқу сағаттарының аясында факультатив қарастырылған. Жалпы білім беретін мектептерде үлгілік оқу жоспарына сәйкес, мұндай сабақтарға бір жарым сағатқа дейін уақыт бөлінген.

— Демек, факультативтер қазір міндетті пәндерге айналды. Сабаққа қатысу – міндетті, – деп түсіндірді Жұлдыз Сүлейменова Құрылтайда өткен баспасөз мәслихатында.
Оның сөзіне қарағанда, бұрын бұл пәндер бойынша баға қойылмаған және аралық бағалау жүргізілмеген. Алайда, осы оқу жылынан бастап тәсіл өзгерді: енді оқушылардың осы пәндер бойынша білімі бағаланатын болады

Бұған дейін 5–7-сыныптарға «Конституция негіздері», 8–11-сыныптарға «Заң және тәртіп», 5–11-сыныптарға «Жеке қауіпсіздік» міндетті оқу курстары енгізілгенін жазған едік.