АСТАНА. ҚазАқпарат – Қазақстандық, әлемнің 296-ракеткасы Михаил Кукушкин АҚШ-тың Тайлер қаласында өтіп жатқан челленджер турнирінің екінші айналымына шықты, деп хабарлайды ҚазАқпарат тілшісі.
Қазақстандық теннисші бастапқы кездесуін дүниежүзілік рейтингте 310-орында тұрған отандасы Денис Евсеевпен өткізді.
Тәжірибелі, 35 жастағы М.Кукушкин сағат жарымнан астам уақытқа созылған бәсекеде 7:6 (7:2), 6:2 есебімен жеңіске жетті.
Михаил Кукушкин ширек финалға шығу үшін әлемнің 194-інші, осы жарыстың 4-ракеткасы, аустралиялық Марк Полманспен таласады.
Тағы бір қазақстандық, рейтингте 325-орындағы Бейбіт Жұқаев алғашқы айналымда әлемнің 220-ракеткасы, түркиялық Азиз Дугазбен кездеседі.
Бұдан бір апта бұрын АҚШ-тың Литтл-Рок қаласында челленджер додасында М.Кукушкин Б.Жұқаевқа есе жіберген еді. Бейбіт сол жарыстың финалына дейін жетті.
Еске сала кетейік, бұдан бұрын қазақстандық теннисшілердің Ролан Гаррос турнирінде қанша табыс тапқанын жазған едік.
Сондай-ақ қазақстандық теннисші Германиядағы жарысты жеңіспен бастады.
Қазақстан мүгедек арбасындағы теннистен алғашқы табысына қол жеткізді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).