ОРАЛ. ҚазАқпарат – Оралда тұрғын есірткіге елтіген күйінде 4 млн теңгенің автокөлігін айдап кеткен, деп хабарлайды ҚазАқпарат тілшісі.
БҚО полиция департаментінің баспасөз қызметі мәлім еткеніндей, оқиға теміржол вокзалы ауданындағы автотұрақта болды.
Белгісіз біреу 31 жастағы тұрғынға тиесілі «Тойота Эстима» автокөлігін айдап кеткен. Келтірілген залал 4 млн теңгені құрады.
Жедел іздестіру іс-шаралары барысында 1982 жылғы тұрғын ұсталды.
Алдын ала тергеу барысында анықталғанындай, есірткіге елтіген күйінде автокөлікті айдаған. Сонымен қатар ол бұрын көлік басқару құқығынан айырылған болып шықты.
Автокөлік арнайы тұраққа қойылып, күдікті уақытша ұстау изоляторына қамалды.
Қазіргі кезде ҚР ҚК 200-бабы 1-бөлігіне (айдап кету) және 346-бабы 1-бөлігіне (көлік құралдарын басқару құқығынан айырылған және алкогольдік, есірткілік масаң күйдегі адамның көлік құралын басқаруы) сәйкес сотқа дейінгі тергеу амалдары жүргізілуде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).