АСТАНА. ҚазАқпарат – Ташкент қаласында ерлер арасында өтіп жатқан бокстан әлем чемпионатында өзбекстандық Руслан Абдуллаев жартылай финалға шықты, деп хабарлайды ҚазАқпарат тілшісі.
Қазақ жігіті 63,5 келіге дейінгі салмақта франциялық Лунес Амрауимен шеберлік байқасты.
Жекпе-жек қорытындысында төрешілердің төртеуі жеңісті Руслан Абдуллаевқа берді.
Осылайша, жартылай финалға өткен Руслан Абдуллаев кемінде қола медаль алады.
Ол финалға шығу үшін олимпиада мен әлем чемпионатының қола жүлдегері, армениялық Оганес Бачковпен таласады.
Бұдан үш-төрт жыл бұрын Руслан Абдуллаев Қазақстанға келіп, ел құрамасына ілігуді мақсат еткенімен, ол ойы орындалмай, Өзбекстанға қайтып кеткен еді.
Осы чемпионатта Өзбекстаннан Хасанбой Дусматов (51 кг) пен Абдумалик Халоков (57 кг) жартылай финалға өтті.
Еске сала кетейік, бұдан бұрын Қытай құрамасындағы қазақ боксшысы әлем чемпионатында қарсыласын нокаутпен ұтқанын жазған едік.
Қазақстан құрамасынан капитан Асланбек Шымбергенов пен Дулат Бекбауов ширек финалға өтті, ал Нұрқанат Райыс пен Серік Теміржанов ширек финалға шыға алмады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).