НҰР-СҰЛТАН. ҚазАқпарат – Қазақстанның жас жұлдызы Заңғар Нұрланұлы Берлинде өтіп жатқан екінші санаттағы Tennis Europe14&U Berlin International турнирінің финалына шықты, деп хабарлайды ҚазАқпарат тілшісі.
Қазақстан теннис федерациясы мәлім еткеніндей, 13 жастағы З.Нұрланұлы жартылай финалда аустралиялық Джимми Маккензиді 6:2, 6:1 есебімен ұтты.
Заңғар ертең шешуші бәсекеде америкалық Карел Обриэл немесе чехиялық Мартин Доскошилдің біреуімен бас жүлдені сарапқа салады.
З.Нұрланұлы 14 жасқа дейінгілер арасындағы Еуропа жасөспірімдер рейтингісінде 127-орында келеді. Берлинде жеңіске жеткен жағдайда алдағы дүйсенбіде жаңартылатын рейтингіде жағдайын едәуір жақсартады. Соңғы жылдары Еуропадағы жарыстарда сынға түсіп жүрген Заңғар техникалық шеберлігін де арттыруда.
Еске сала кетейік, бұдан бұрын Зарина Диястың жұптық сында Уимблдон турнирін сәтті бастағанын, Александр Бубликтің әлемнің 21-ракеткасын ұтып, үшінші айналымға өткенін жазған болатынбыз.
Сондай-ақ Андрей Голубев жұптық сында екінші айналымға шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).