ПРАГА. KAZINFORM — Қазақстандық теннисші, әлемнің 445-ракеткасы, 24 жастағы Жібек Құламбаева Прага (Чехия) WTA 250 турнирінің іріктеу сайысын сәтті бастады.
Қазақстандық спортшы алғашқы кездесуін дүниежүзілік рейтингіде 551-орында тұрған мажарстандық Река-Лука Янимен өткізді.
Бірінші партияда Жібек 6:3 есебімен басымдылық танытса, екіншісінде қарқынын тіпті үдетті – 6:1. Бір сағат 20 минутқа созылған бәсеке барысында Құламбаева 8 брейк-пойнттың бесеуін пайдаланды. Яни 1 брейкпен (4 брейк-пойнт) шектелді.
Жібек Құламбаева іріктеу сайыстарының финалында әлемнің 255-ракеткасы, 21 жастағы ресейлік Оксана Селехметиевамен негізгі жарыстың жолдамасы үшін таласады. Ол рейтингіде 400-орындағы германиялық Стефани Вагнерді жолдан тайдырды – 6:2, 6:1.
Еске сала кетейік, бұдан бұрын Президент кубогінде Әмір Омархановты ұтқан теннисшінің финалға шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).