НҰР-СҰЛТАН. ҚазАқпарат – Жібек Құламбаева жұптық сында Шымкент ITF турнирінің жеңімпазы атанды, деп хабарлайды ҚазАқпарат тілшісі.
Жарыстың 1-ракеткасы болып тіркелген Жібек Құламбаева нидерландылық Джудит Виссхермен бірге финалда қазақстандықтар Жанель Рүстемова – Аружан Сағындықовамен бірге бас жүлдені сарапқа салды.
Бірінші партия тартысты өрбіп, тай-брейкте Жібек пен Джудит сәтті ойнады – 7:6 (7:4).
Екінші партияда олардың басымдылығы айқын сезілді – 6:1.
Осылайша, Жібек Құламбаева Шымкентте екінші рет қатарынан жұптық сында үздік шықты. Өткен аптада ресейлік Анастасия Сухотинамен бірге чемпион атанған еді.
Жібек жекелей сында да табысты өнер көрсетіп келеді. Бүгін ол Анастасия Сухотинаны 6:2, 4:6, 6:1 есебімен тізе бүктіріп, финалға жолдама алды. Ертең соңғы бәсекеде тағы бір ресейлік Татьяна Барковамен сынға түседі.
Еске сала кетейік, бұдан бұрын қазақстандық теннисшілердің Шымкент турнирінің финалына шыққанын, жасөспірімдер құрамасының тұңғыш рет әлем чемпионатына жолдама алғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).