АСТАНА. KAZINFORM — Қазақстанның екінші, әлемнің 66-ракеткасы Юлия Путинцева Токио (Жапония) WTA 500 турнирінің іріктеу сайысын жеңіспен бастады.
Іріктеудің 8-ракеткасы болып тіркелген қазақстандық теннисші рейтингіде 221-орындағы жапониялық Хау Киноситамен сынға түсті.
Бұл қос спортшының өзара алғашқы кездесуі еді.
Сағат жарымға жуық уақытқа созылған бәсекеде Ю.Путинцева 7:5, 6:2 есебімен жеңіске жетті.
Юлия Путинцева іріктеу сайысының финалында рейтингіде 589-сатыдағы тағы бір жапониялық Саяка Иишимен шеберлік байқасады. Оны жолдан тайдырса, негізгі жарысқа жолдама алады.
Токиода 26 қазан – 1 қараша аралығында өтетін додада қазақстандық Елена Рыбакина бірінші ракетка болып тіркелген. Екінші айналымнан бастайтын ол әлемнің 31-ракеткасы, грекиялық Мария Саккари немесе іріктеу сайысы жеңімпаздарының бірімен ойнайды.
Еске сала кетейік, бұдан бұрын Алматы турнирінде Бубликтің 2024 жылғы чемпионды жеңіп, жартылай финалға шыққанын жазған едік.
Сондай-ақ Қытайдағы Нинбо турнирінде Елена Рыбакина екінші жыл қатарынан финалға шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).