АСТАНА. KAZINFORM — Қазақстан ұлттық құрамасының мүшесі Жібек Құламбаева жұптық сында Маспаломас (Испания, Гран-Канария аралы) ITF W100 турнирін сәтті бастады.
Жарыстың 2-ракеткасы болып тіркелген қазақстандық теннисші чехиялық Анна Шишковамен бірге алғашқы айналымда германиялық Жоэль Стойр — финляндиялық Лаура Хиетарантаның мысын басты — 6:4, 6:2.
Бәсеке 1 сағат 22 минутта аяқталды.
Жібек Құламбаева — Анна Шишкова жартылай финалға шығу үшін нидерландылық Деми Тран — франциялық Наийи Берекоэчэамен таласады.
Жекелей сында әлемдік рейтингіде 466-орында тұрған Ж.Құламбаева бұдан бір күн бұрын әлемнің 155-ракеткасы, испаниялық Андреа Лазаро Гарсиямен тартысты кездесу өткізді.
Екі сағат 22 минутқа созылған матчта қазақстандық теннисші жергілікті спортшыға 3:6, 5:7 есебімен жол берді.
Еске сала кетейік, бұдан бұрын Жібек Құламбаеваның әлемдік рейтингіде жұптық сында 115-орынға көтерілгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).