АСТАНА. KAZINFORM - Қазақстандық теннисші Жібек Құламбаева жұптық сында Нагпур (Үндістан) ITF W15 турнирінде топ жарды.
Қазақстандық теннисші ресейлік Екатерина Яшинамен бірге жарыстың фавориті атағын ақтап шықты. Олар соңғы бәсекеде доданың 2-ракеткалары, ресейліктер Ксения Ласкутова - Элина Неплиймен чемпиондық атақты сарапқа салды.
Бірінші партияда ресейлік жұп 7:5 есебімен басым түсті. Бұдан кейін Құламбаева - Яшина камбэк жасап, супер тай-брейкте жеңісті жұлып алды - 6:4, 10:6.
Жібек Құламбаеваның осы жарыста абсолютті жеңімпаз атанатындай мүмкіндігі бар. Ол үшін жекелей сында финалда үндістандық Сонал Патилді жеңсе жетіп жатыр.
Еске сала кетейік, бұдан бұрын Жібек Құламбаеваның Үндістандағы турнирде чемпиондық атақ үшін таласатынын жазған болатынбыз.
Сондай-ақ Жібек Құламбаева Үндістандағы жарыстың финалына жолдама алды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).