1 мамырда Түркияда не болды
АСТАНА. KAZINFORM – Түркияның көптеген қалаларында 1 мамыр – Еңбек және ынтымақ күні мерекесіне байланысты үлкен наразылыққа ұласқан жаяу шерулер өтті. Ең үлкен шаралар Ыстанбұлда болған. Мегаполистің әртүрлі бөліктерінде көптеген адамдарға қарсы күш қолданылды. Барлығы 226 адам ұсталды.
Ыстанбұл билігі азаматтарға 1 мамыр мерекесін Таксим алаңында атап өтуге тыйым салуына байланысты наразылық білдірген адамдар тобы қауіпсіздік күштерімен қақтығысты.
Аймақ губернаторы мерекені алаңда тойлауға тыйым салғанымен, кәсіподақтар мен саяси партиялардың өкілдері шеруді оған қарамастан өткізуге шешім қабылдады. Олар орталық алаңға жақындаған кезде полицейлер көзден жас ағызатын газ бен басқа да арнайы құралдарды қолдана бастады.
Ыстанбұл орталығындағы Таксим алаңының кәсіподақтар мен оппозиция үшін символдық мәні бар. Белсенділер 1977 жылғы 1 мамырдағы оқиғаны еске алу үшін сол жерде митинг өткізбек болған. Сол жылы осы алаңда көптеген шерушілер оққа ұшты. Бұл оқиғаға 500 мыңға жуық адам қатысты. Түрлі дереккөздерге сәйкес, оқ ату салдарынан 40-тан астам адам қаза тауып, 220-дан астам адам жарақат алған.
Алаң сонымен қатар оппозиция сөз сөйлейтін орынға айналды. 2013 жылы мұнда ел үкіметінің осы аттас алаңның жанында орналасқан Таксим-Гези саябағы орнында құрылыс жұмыстарын жүргізуге қарсы наразылық шаралары басталды. Олар Түркияның сол кездегі премьер-министрі және қазіргі президенті Режеп Тайип Ердоғанға қарсы жалпыұлттық шерулерге ұласты. Наразылық шерулері басылған соң түрік билігі аймақта үкіметке қарсы жиындар өткізуге тыйым салды.
Кеше – 1 мамырда Таксим алаңына Истикляль даңғылы бойындағы тұйық көшелер арқылы өтпек болған түрлі топтардың жаяу шеруіне полиция араласты. Қолдарына транспаранттар мен плакаттар ұстаған азаматтарға тосқауыл қойылды. 20-дан астам адам ұсталды.
Құқық қорғаушылар сондай-ақ Таксим алаңына Бешікташ ауданынан жаяу бармақ болған адамдардың шеруіне де араласты. Ұрандар айтқан бір топ азамат қамауға алынды.
Бұдан басқа, қолдарына транспарант алған түрлі саяси партиялар мен жастар қозғалысының бір топ адамы да Таксимге жаяу жетуге әрекеттенді. Полиция оларды Шишли аймағында тоқтатты. Билікке қарсы ұрандар айтқан азаматтар ұсталды. Шеру төбелеске ұласты. Полиция демонстранттарды тыныштандыру үшін күш қолдануға мәжбүр болды.
Куртулуш ауданында да Таксим алаңына шеруге шыққысы келгендерге тәртіп сақшылары кедергі жасады. ІІМ-нің арнайы бөлімшелері 10-нан астам адамды ұстады. Олар полиция учаскелеріне жеткізілді.
Сонымен бірге Долапдере аймағынан Таксимге жаяу бармақ болған қалың топ азаматтың жаяу жүруіне полиция тосқауыл жасады. Көп рет ескерту жасалғанына қарамастан қарсылық танытқан 5 адам ұсталды.
Сондай-ақ, профессор Джемиль Ташджиоглу атындағы қалалық аурухана ғимаратының жанына түрлі кәсіподақ мүшелерінің арасынан адамдар жинала бастады. Олар да Таксим алаңына шеруді жоспарлаған. Полиция жиналғандарды таратып, ең белсенді азаматтарды ұстады.
Түркия Ішкі істер министрі Әли Йерликаяның мәлімдемесі бойынша, рұқсат етілмеген шерулер мен митингілерді тоқтату қорытындысы бойынша барлығы 226 адам ұсталды. Бұл ретте 28 тәртіп сақшысы жеңіл жарақат алды.
