10 өңір өнеркәсіптік шығарындыларды автоматты бақылау жүйесін орнатуға қаржы таппай отыр
АСТАНА. KAZINFORM – Экология және табиғи ресурстар министрі Ерлан Нысанбаев Мәжілісте өтіп жатқан қоршаған ортаны қорғау туралы дөңгелек үстелде өнеркәсіптік шығарындыларды автоматты бақылау жүйесін орната алмай отырған өңірлер бар екенін айтты.
«Сонымен бірге 1-санаттағы ірі кәсіпорындардың өнеркәсіптік шығарындыларын бақылау мақсатында автоматтандырылған мониторинг жүйесін орнату бойынша жұмыстар жүргізіліп жатыр. Жүйені 2024 жылдың соңына дейін орнатуға міндетті 91 кәсіпорын белгіленді. Бүгінгі таңда 65 кәсіпорын мониторингтің автоматтандырылған жүйесін орнатты», - деді ол.
Ерлан Нысанбаев жыл аяғына дейін 9 кәсіпорын мониторингтің автоматтандырылған жүйесін орнатуды жоспарлап отырғанын атап өтті.
«Қаражаттың болмауына байланысты 10 өңірде 17 кәсіпорын мониторингтің автоматтандырылған жүйесін орнатпаған. Оның ішінде жергілікті атқарушы органдарға тиесілі 12 коммуналдық және 5 энергетикалық кәсіпорын. Жұмысты күшейту мақсатында Кәсіпкерлік кодексіне қоршаған ортаға эмиссияларды мониторингтің автоматтандырылған жүйесі деректері негізінде жоспардан тыс тексерулер жүргізу үшін өзгерістер енгізу ұсынылады. Осы ұсынысты қолдауларыңызды сұраймыз», - деді министр.
Еске сала кетейік, бұған дейін Экология және табиғи ресурстар министрі қоршаған ортаны қорғау жоспарын орындамаған әкімдерді заңмен жазалауды ұсынған болатын.
