2014 жылы ақтөбелік полицейлер броконьерлерден 500 дана ақбөкен мүйізін тәркілеген

АҚТӨБЕ. ҚазАқпарат - Ақтөбелік полицейлер 2014 жылы 500-ден астам рейд шараларын жүргізді, екі мыңнан астам аңшылық, балық шаруашылықтарын тексерді.

Табиғат қорғау заңнамасын бұзғандар 306, заңсыз аң аулау мен аңшылық қағидаларын бұзу фактілері - 137, су жануарларын заңсыз аулау және балық шаруашылығы қағидаларын бұзу жағдайы - 144, өсімдіктер әлемін қорғау саласында 20 бұзушылық, 5 басқа да бұзушылықтар анықталған. Жергілікті тұрғындарға жүргізілген рейдтік шаралар барысында 500 дана ақбөкен мүйізі тәркіленген.

Заңсыз аң аулау мен аңшылық қағидаларын бұзған 137 фактінің 123-іне қылмыстық іс қозғалса, 250 факті бойынша жалпы сомасы 1 миллион 155 мың 692 теңге әкімшілік айыппұл салу туралы қаулы шығарылды, оның 874 мың 144 теңгесі өндіріп алынды, деп хабарлады Ақтөбе облысы ІІД баспасөз қызметінен.