2015 жылдан бастап түлектердің аттестатына баға мен ҰБТ балының орташа арифметикалық мәні қойылады - ҚР БҒМ

АСТАНА. ҚазАқпарат - Биылғы жылдан бастап қазақстандық мектептердің барлық түлектерінің аттестатына пән бойынша жылдық баға мен Ұлттық бірыңғай тестілеуден алған балдың орташа арифметикалық бағасы қойылады, деп хабарлады Үкімет басшысының сайты.

Бұл туралы Қазақстан Республикасы Білім және ғылым министрлігінің Білім және ғылым саласындағы бақылау комитетінің төрағасы Саят Нүсіпов ОКҚ брифингінде мәлім етті. «Тестілік пәндер бойынша орташа арифметикалық мән енгіземіз, ол баға түрінде аттестатқа қойылады. Бұл бұрыннан бері пісіп-жетілген түзету, бүгінде ол жүзеге асырылып, министрлік тиісті бұйрық шығарды», - деді С.Нүсіпов.

Ол мұндай өзгеріс түлектердің білімін әділетті бағалау үшін қажет екенін атап өтті. Себебі «жақсы» және «үздік» оқитын оқушы психологиялық және басқа да себептер бойынша ҰБТ-ден төмен балл алып қалуы мүмкін.

«Егер оқушы ҰБТ-ден «3» деген бағаға сәйкес балл алса, онда аттестатқа мектептегі жоғары бағаны ескере отырып, «4» деген баға қойылады. Ал, «үздік» оқитындарға қатысты егер оқушы мектепте бестік деген бағалар алып келіп, ҰБТ-де «4» алса, ендеше аттестаттың орташа балы 4,5 болып, аттестатқа «5» деген баға қойылады», - деп түсіндірді комитет басшысы.

Оған қоса, С.Нүсіповтің айтуынша, бұл өзгеріс мектепте жақсы баға алмаса да, шпаргалка немесе ереже бұзып ҰБТ-ден жақсы балл алу мүмкіндігін жоюға көмектеседі.