4,7 млрд теңге: Алматыда инвестор есебінен Баум тоғайы абаттандырылады

АЛМАТЫ. KAZINFORM — Алматыда Баум тоғайын абаттандыру жобасы басталды.

Алматы әкімдігінің мәліметінше, қаладағы құрылыс компанияларының бірі Баум атындағы тоғайды абаттандыру жобасын қолға алып, оған 4,7 млрд теңге бөлді.

— Баум тоғайы — аумағы 137,7 гектар болатын қаладағы бірегей орман алқабы. Бұл жер қаладағы сирек сақталған табиғи ландшафт пен алуан түрлі ағаш түрлерін бойына сыйдырған құнды жасыл аймақ саналады. Абаттандыру жобасының мақсаты экожүйеге зиян келтірмей, демалыс пен серуенге арналған инфрақұрылымды жасау, — деп хабарлады әкімдіктен.

Жоба аясында тоғай аумағында шағын сәулеттік пішіндер орнатылып, серуен жолдары мен демалыс аймақтары жасалмақ. Одан бөлек бір бөлігі тыныш демалысқа арналса, екінші бөлігі экологиялық аймақ ретінде инфрақұрылымы шектеулі күйде қалып, табиғатты қорғау мен экологиялық ағартуға бағытталады.

Еске салайық, бұған дейін Алматының Алатау ауданында ең үлкен саябақтардың бірі салынатынын жазғанбыз.