Абхазиядағы жағдай: Бжания өз орнында қалды, оппозиция парламентке жүгінеді

АСТАНА. KAZINFORM – Абхазия президенті Аслан Бжания 15 қарашада болған Сухумдағы оқиғаны мемлекеттік төңкеріс әрекеті деп атады және ол елдің президенті болып қала беретінін баса айтты. Бұл туралы ТАСС ақпарат агенттігі жазды.

– Абхазияда үкіметтік ғимараттар кешені маңындағы тәртіпсіздіктерден зардап шеккендердің саны 14 адамға жетті, - деп мәлімдеді «Апсныпресс» агенттігі.

Абхазия президенті Аслан Бжания қарашаның 15-і күні Сухумда болған шерушілер қоршауларды бұзып өтіп, аумаққа, одан кейін парламент, президент әкімшілігі мен үкімет ғимараттарына кіріп кеткен оқиғаны мемлекеттік төңкеріс жасау әрекеті деп атады. Сондай-ақ Бжания оппозицияның мәлімдемелеріне қарамастан Абхазия Республикасының сайланған президенті болып қала беретінін айтты.

Ол Абхазияға қазір Ресей Федерациясымен инвестициялық жобалар туралы келісімге қарағанда күрделі және өзекті мәселелерді шешу қажет екенін атап өтті.

Оппозиция талаптары

Абхазиядағы оппозиция парламентті жалғыз заңды мемлекеттік орган деп санайтынын мәлімдеді. Бұл туралы оппозициялық ұйымдардың өкілі саналатын Саяси дағдарысты еңсеру жөніндегі үйлестіру кеңесі мәлімдеді.

Оппозицияның пікірінше, Абхазия Республикасының парламенті жалғыз заңды мемлекеттік орган ретінде республиканың бүгіні мен болашағы үшін толық жауапкершілікті өз мойнына алуы керек.

Инвестициялық келісім туралы

30 қазанда Мәскеуде Ресейдің Экономикалық даму министрі Максим Решетников пен Абхазия премьер-министрінің орынбасары әрі экономика министрі Кристина Озган ресейлік компанияларға Абхазияда инвестициялық жобаларды жүзеге асыруға мүмкіндік беретін келісімге қол қойды. Құжат тараптардың құқықтары мен міндеттерін айқындап, заңды тұлғаларды қолдау шараларын белгілейді.

Оппозиция жетекшілерінің бірі, «Абхаз халықтық қозғалысы» қоғамдық ұйымының төрағасы Адгур Ардзинба республикада 2014 жылы қабылданған инвестициялық қызмет туралы заң бар және онда инвесторларға кепілдіктер, арнайы шарттар мен жеңілдіктер қарастырылғанын айтты.

Оның сөзінше, жаңа келісімде пәтерлерді сатуды заңдастырудың жасырын түрі қарастырылған. 5 қарашада Сухумда республиканың қазіргі билігіне қарсы қоғамдық ұйымдар келісімді Абхазияның экономикалық егемендігіне деструктивті деп есептеп, оны ратификациялауға қарсы штаб құрды.

Ақпаратты «ҚазАқпарат» агенттігіне серіктес ТАСС агенттігі таратты.