«Адал азамат» тәрбие бағдарламасы барлық білім беру ұйымына енгізіледі

АСТАНА. KAZINFORM – Алдағы уақытта «Адал азамат» тәрбие бағдарламасы еліміздегі барлық мемлекеттік білім беру ұйымына енгізіледі. Бұл туралы Орталық коммуникациялар қызметіндегі брифингте Оқу-ағарту вице-министрі Еділ Оспан айтты.

- 14 наурызда Бурабайда өткен Ұлттық құрылтайдың ІV отырысында Мемлекет басшысы «Тәрбиесіз берілген білім – адамзаттың қас жауы». Сондықтан біліммен қатар тәрбиеге айрықша назар аудару өте маңызды екенін атап өтіп, құрылтай мүшелері алдағы уақытта осы бағдарламаны «Адал азамат» деп атауды ұсынғанын және бұл ұсыныспен толық келісетінін қадап айтты. Алдағы уақытта «Адал азамат» тәрбие бағдарламасы еліміздегі барлық мемлекеттік білім ошағында, оның ішінде барлық жекеменшік білім беру ұйымдарына енгізіліп, іске асырылатын болады, - деді ол.

Вице-министрдің айтуынша, «Адал азамат» бағдарламасының түпкі мақсаты – қоғамның мызғымас тірегі, отаншыл, білімді, жасампаз ұрпақ тәрбиелеу, әділеттіліктің, адамгершіліктің, жауапкершілік пен еңбексүйгіштіктің айқын бейнесі болатын адал азамат қалыптастыру.

- «Адал азамат» біртұтас тәрбие бағдарламасы тек қана білім беру ұйымдарындағы ғана емес, барлық мемлекеттік ұйымдардағы тәрбие жұмысына қатысты іс-қимылдың негізіне айналады. Сондықтан Оқу-ағарту министрлігі осы жұмыстарды бағдарлама аясында біріздендіріп жатыр. Бағдарлама мазмұнына сәйкес білім ұйымдарындағы тәрбие процесі құндылыққа және құзыреттілікке бағдарланған тәсілдер арқылы іске асырылады, - деді Еділ Оспан.