АЭС құрылысына қатысты референдум: Қырғызстанда дауыс беру басталды
БІШКЕК. KAZINFORM – Бүгін Қазақстанда атом электр стансасын салу бойынша республикалық референдумда дауыс беру өтеді. Бішкекте Астана уақытымен таңғы сағат 6:00-де (жергілікті уақыт бойынша 7:00) Қазақстанның Қырғыз Республикасындағы Елшілігі ғимаратында орналасқан №396 сайлау учаскесі жұмысын бастады, деп хабарлайды Kazinform агенттігінің меншікті тілшісі.
Сайлау комиссиясының мүшелері мен қазақстандық дипломаттар референдум өтетін алаңның салтанатты ашылу рәсімін өткізді. Рәсім Қазақстан Республикасының Әнұранымен басталды.
Елшіліктің мәліметінше, сайлаушылар тізімінде жеке, ресми, білім беру, іскерлік және туристік мақсатта Қырғызстанда тұратын немесе елде жүрген 300 қазақстандық бар. Олардың көпшілігі консулдық есепте тұрады.
Дауыс беру сағат 20.00-ге дейін жалғасады. Одан кейін учаскелік комиссия мүшелері дауысты санауға кіріседі. Еліміздің азаматтары осы уақыт аралығында конституциялық құқығын жүзеге асырып үлгере алады.
Дауыс беруге кәмелеттік жасқа толған қазақстандықтар қатыса алады. Ол үшін жеке басын куәландыратын құжаты болуы керек.
Бұған дейін Сеулдегі референдумда бірінші қазақстандық болып халықаралық ұйым қызметкері Камила Маутова дауыс бергенін жазған болатынбыз.
