Ақмола облысында референдум қалай өтіп жатыр
КӨКШЕТАУ. KAZINFORM – Ақмола облысында дауыс беру қызу жүріп жатыр. Дауыс беру процесіне 10 қоғамдық бірлестік және коммерциялық ұйым өкілдері байқаушы ретінде қатысуда.
Ақмола облыстық референдум комиссиясының мәліметінше, облыс бойынша барлығы 765 референдум учаскесі бар, оның 705-і азаматтарды тіркеу орны бойынша, 60-ы – уақытша болу орындарында.
«Барлығы 786 референдум комиссиясы жұмыс істеп жатыр, оның ішінде Ақмола облысының аумақтық референдум комиссиясы бар. Оның 20-сы қалалар мен аудандардың аумақтық референдум комиссиясы болса, 765-і учаскелік референдум комиссиясы. Ондағы комиссия мүшесінің саны 4 540 адамды құрайды, оның 147-сі аумақтық референдум комиссиясының және 4 393-і учаскелік референдум комиссиясының мүшелері. Ал, облыс бойынша дауыс берушілер саны 513 254 адам», - деді Ақмола облыстық референдум комиссиясынан.
Бұған қоса, 2024 жылғы қазанның 5-інде Ақмола облысының референдум комиссиясына дауыс беруге байқаушы ретінде 10 қоғамдық бірлестік және коммерциялық ұйым тіркелді.
«Дауыс беру заң бұзушылықсыз өтіп жатыр. Ауыл тұрғындары дауыс беруде белсенді. Жастар, ерлі-зайыптылар, қарттар да саяси науқаннан қалыс қалмауда», - деді Есіл ауданының Жаныспай ауылындағы № 434 учаскедегі «Дауыс қоғамдық байқаушылар коалициясы» республикалық қоғамдық бірлестігінің байқаушысы Сәттігүл Әукен.
Айта кетсек, бұдан бұрын ел бойынша 10 249 референдум учаскесінде дауыс беру басталғанын жазған едік.
