Ақмолада ерекше фотокөрме ұйымдастырылды
КӨКШЕТАУ. KAZINFORM – Ақмолада «Заң және тәртіп» қағидатын жүзеге асыру аясында ерекше фотокөрме ұйымдастырылды, - деп жазды Polisia.kz.
Оның мақсаты – полиция қызметкерлерінің күнделікті еңбегін жұртшылыққа таныстырып, құқықтық тәртіп пен қоғамдық қауіпсіздікті қамтамасыз етудегі олардың маңызды рөлін айшықтау.
Экспозиция түрлі полиция бөлімшелерінің жұмыс ерекшеліктерін кеңінен ашып көрсетеді. Көрермендер нақты қызметтік жағдайларда түсірілген фотосуреттерді тамашалай алады: жедел және патрульдік қызмет, кинологтар мен ювеналды полиция, сондай-ақ арнайы жасақтың жұмысы. Әрбір сурет – қажырлы еңбек пен жауапкершіліктің айқын көрінісі.
Көрмеге «Жас Сақшы» полиция сыныптарының оқушылары да белсене атсалысты. Олар келушілерге ұсынылған материалдар жөнінде әңгімелеп, жастарды құқық қорғау органдарының қызметімен жақынырақ таныстыруға ықпал етті.
– Бүгінгі іс-шара арқылы біз жас буынды ішкі істер органдарындағы қызметтің мән-маңызы туралы кеңінен ақпараттандырып, оларды осы абыройлы мамандықты таңдауға ынталандыруды көздеп отырмыз, – деді Ақмола облысы ПД жеке құраммен жұмыс басқармасының бастығы Ғалымжан Садықов.
30-дан астам жұмыстан құралған бұл фотокөрме полицейлердің қызмет күндерін бейнелеумен қатар, қоғамда сенім ұялатып, азаматтар мен тәртіп сақшылары арасындағы байланысты нығайта түседі.
Бұған дейін Семейде полиция көрмесі ұйымдастырылғанын жазған болатынбыз.
