АҚШ Қаржы министрі Nvidia компаниясына жаңа басшыны сырттан іздеуді ұсынды
АСТАНА. KAZINFORM — АҚШ Қаржы министрі Скотт Бессент америкалық технологиялық Nvidia компаниясына жаңа бас директорды өз қызметкерлерінің арасынан емес, сырттан іздеуге кеңес берді, деп хабарлайды Анадолы.
Бұған компанияның негізін қалаушы Дженсен Хуангтың өткен аптада қызметінен кетуі себеп болған.
— Бұл жағдай директорлар кеңесі жаңа басшыны іздеу барысында сырттан үміткерлерге назар аударуы керек деген ойға жетелейді. Компания ішінде болған жайттарды ескерсек, елеулі өзгерістер қажет, — деді Бессент Fox News телеарнасына берген сұхбатында.
Бұған дейін АҚШ президенті Дональд Трамп Nvidia басшысы қызметіне Apple компаниясы директорлар кеңесінің атқарушы төрағасы Тим Куктың кандидатурасын ұсынған болатын. Бұл ұсыныс Дженсен Хуанг қызметінен кеткеннен кейін айтылды.
Бессент Хуангтың жаңашыл маман ретіндегі еңбегін жоғары бағалай отырып, компанияның технологиялық көшбасшылығы оны бақылау талаптарын бұзғаны үшін жауапкершіліктен босатпайтынын атап өтті.
Министрдің айтуынша, АҚШ-тың Ұлттық банктер қызметін қадағалайтын Валюта бақылаушысы басқармасының (OCC) федералдық реттеушілері қаржы ұйымдарында осындай заңбұзушылықтар болған жағдайда олардың басшыларын дереу қызметінен шеттетер еді.
Сондай-ақ Бессент Nvidia компаниясының Сингапурдағы делдал компанияларды пайдалануына қатысты ескерту белгілерін не себепті елемегеніне күмән келтірді.
Оның сөзінше, Қытайда өнім сатудан түсетін табыс азайып, Сингапурдағы сатылым күрт өскеннен кейін компания кейбір өңірлер бойынша сату көрсеткіштерін жариялауды тоқтатқан. Ал министр келтірген мәліметтерге сәйкес, Сингапурда сатылған чиптердің небәрі 1 пайызы ғана қалған.
— Менің ойымша, бізге жаңа заңнамалық нормалар қажет емес. Қолданыстағы ережелердің бәрі бар. Тек олардың орындалуын қамтамасыз ету керек, — деді министр.
12 қарашада Дженсен Хуанг өзі 30 жылдан астам уақыт басқарған Nvidia компаниясының басшысы қызметінен кетті. Сондай-ақ ол Сингапурдағы Megaspeed бұлтты технологиялар компаниясының бұрынғы бас директоры Алиса Хуангпен некеден тыс қарым-қатынаста болғанын мойындады. Бұған дейін БАҚ-та Алиса Хуанг Қытай барлау қызметінің ықтимал агенті болуы мүмкін деген болжамдар жарияланған.
Бессент тыңшылық туралы болжамдарды «жала жабуға негізделген ойдан шығарылған әңгіме» деп жоққа шығарды. Оның айтуынша, басты алаңдаушылығы — Nvidia компаниясындағы корпоративтік мәдениет табысты жасанды түрде арттыру үшін «заңсыз болуы мүмкін сатылымдарды» ынталандырған болуы ықтимал.
Министр Nvidia директорлар кеңесі мен сыртқы заң кеңесшілерінен туындаған сұрақтарға 10 күн ішінде жауап беруді талап етті.
Бұған дейін АҚШ Әділет министрлігі Nvidia компаниясына қатысты үш тергеу жүргізіп жатқаны белгілі болды.
