АҚШ пен Иран арасындағы жағдай мұнай бағасына әсер етті
АЛМАТЫ. KAZINFORM — Дүйсенбі күні таңертең әлемдік мұнай бағасы төмендеді.
Дүйсенбі таңертеңгі сауда-саттық деректеріне сәйкес, Brent маркалы мұнайдың фьючерстері 0,57%-ға арзандап, барреліне 97,76 доллар болды.
WTI маркалы мұнайдың бағасы 0,11%-ға төмендеп, барреліне 90,73 долларға дейін түсті.
Ал ресейлік Urals маркалы мұнайдың құны барреліне 76,85 долларға жетті. Оның бағасы 10%-ға төмендеді.
Мұнай бағасының арзандауына әсер еткен факторлардың бірі — АҚШ президенті Дональд Трамптың Вашингтон мен Тегеран арасындағы қақтығысты тоқтату жөніндегі консультацияларда айтарлықтай оң нәтиже бар екені туралы мәлімдемесі.
Қатар АҚШ пен Иран арасындағы жанама келіссөздерде негізгі делдалдардың бірі саналады. 6 қарашада Қатар әмірі шейх Тамим бен Хамад Әл Тани АҚШ президенті Дональд Трамппен Таяу Шығыстағы шиеленісті бәсеңдетуге бағытталған дипломатиялық күш-жігерді талқылады.
Сонымен қатар жексенбі күні хуситтер Эр-Риядтағы Saudi Aramco компаниясының кеңселеріне шабуыл жасағанын мәлімдеді.
Шабуыл қаупіне байланысты Эр-Риядта, Наджран өңірінде, сондай-ақ Шығыс провинциясындағы Даммам, Әл-Ахса және Букайк қалаларында ерте ескерту жүйелері іске қосылды. Кейін билік өкілдері қауіптің сейілгенін хабарлады.
