АҚШ-тан депортацияланатын адамдардың саны белгісіз — СІМ

АСТАНА. KAZINFORM — Сыртқы істер министрінің орынбасары Әлібек Бақаев АҚШ-та заңсыз жүрген Қазақстан азаматтарына қатысты пікір айтты.

— Бұл мәселе АҚШ-тың саясатына қатысты. Сондықтан АҚШ-тың миграциялық заңын бұзған Қазақстан азаматтары міндетті түрде елімізге қайтарылады. Олардың санын дәл қазір айта алмаймын. Бұл тұрғыда ақпарат алмасу жүріп жатыр. Нақты деректер болса, жарияланады. Атап айтқанда, адамдар бойынша есеп болуы мүмкін, бірақ нақты сан жоқ. Яғни кім және қашан қандай депортацияға жататыны туралы дерек болмай тұр, — деді Әлібек Бақаев Сенаттың жалпы отырысынан кейін тілшілер сұрағына жауап бере отырып.

Еске салсақ, былтыр АҚШ-та депортацияға жататын мигранттардың арасында 369 қазақстандық туралы ақпарат тараған. 

Биыл қаңтар айында АҚШ-тағы миграциялық саясаттың қатаңдатылуына байланысты Қазақстан елшілігі шетелде құжатсыз, визасыз жүрген қазақстандықтарға ескерту жасады. 
ҚР Сыртқы істер министрлігі Қазақстан азаматтары АҚШ-тан емін-еркін шыға алатынын мәлімдеді.