Ақтау Дубайға айнала ма: бас жоспарға өзгеріс енгізілді
АСТАНА. KAZINFORM — Ақтауды Баку мен Дубай қалаларының үлгісі бойынша дамыту үшін бас жоспарға өзгеріс енгізілді.
Бұл туралы Маңғыстау облысының әкімі Нұрдәулет Қилыбай мәлім етті.
— Жуырда Үкіметте Маңғыстау облысын дамытуға арналған жиын өтті. Ол жиында 2027 жылға дейін туристік кластерді дамытуға бағытталған 167 млрд теңгенің 14 ірі жобасы іске асыру жоспарланды. Бозжыра мен Айрақтыда әр қайсысы 150 орындық қонақүй кешені бой көтеріп, Каспий жағалауында 500 адамға дейін демалатын сауықтыру кешені мен балалар сауықтыру лагерлерін салу да жоспарланған. Ақтауды Баку мен Дубай қалаларының үлгісі бойынша дамыту үшін бас жоспарға өзгеріс енгізілді. Жоспарға сай қалада 10 мың орындық стадион, теңіз вокзалы, «Әуенді домбыра» сәулет құрылысы мен жаңа жағажай сынды нысандар бой көтереді деп күтілуде, — деді Нұрдәулет Қилыбай орталық коммуникациялар қызметі алаңында өткен баспасөз мәслихатында.
Сондай-ақ, әкім «Ақтау» әуежайынан ұшатын ішкі және халықаралық әуе рейстерінің (28 бағытқа) артатынын айтты.
— Кендірліде жаңа әуежай салынады. Сонымен қатар, «Маңғыстау» теміржол вокзалы қайта жаңғыртылып, нәтижесінде тәулігіне 2,5 мың жолаушыны қабылдайды. Алдағы 5 жылда Маңғыстаудан қатынайтын жолаушылар пойыздарының 250 вагоны жаңарып, Құрық портында паромдық паркі құрылады деп отырмыз, — дейді облыс басшысы.
Одан бөлек, Нұрдәулет Қилыбай Ақтау мен Жаңаөзен қаласында озық үлгідегі жаңа драма театрлары салынатынын жеткізді.
— Дарынды балаларға арналған спорт мектеп интернатының құрылысын жүргізу де даму жоспарына енгізілді. Спорт мектеп интернаты жоқ бірден бір өңір едік. Бұл орталық болашақ чемпиондарды дайындап шығады деп сенеміз, — деп толықтырды өңір әкімі.
Бұған дейін Маңғыстау облысының әкімі ақтаулықтардың ауызсуға жарымай отырғанына қатысты түсінік берді.
Айта кетейік, жыл басынан бері Ақтау портынан 6,8 млн тонна жүк тасымалданып, өсім 3,5%-ға артты.
Сонымен қатар Маңғыстау облысының әкімі Нұрдәулет Қилыбайдан өңірдегі кадр мәселесіне қатысты пікірін сұраған едік.
