Ақтауда Каспий су тұщыту зауытының қуаты 2 есе артты

АҚТАУ. KAZINFORM — Осы кезге дейін тәулігіне 20 мың текше метр ауыз су өндіріп келген кәсіпорын бүгінде 40 мың текше метр су тұщытып беріп отыр.

Зауыттың қуатын арттыруды Мемлекет басшысы тапсырған болатын. Соған сәйкес, кәсіпорында 2021 жылы қайта жаңғырту жұмыстары басталып, былтыр желтоқсанда аяқталды.

Зауыт директоры Серік Гусманның айтуынша, модернизация жұмыстарына мемлекеттен бөлінген 17 млрд теңге жұмсалған.

— Модернизациялау аясында іргетасынан бастап құрылыс ангарлары салынды. Үлкен қондырғылар әкелінді. Жаңадан 30 дан астам жұмыс орны ашылды. Соның арқасында бүгінде 160 адам тұрақты түрде жұмыс істеп жатыр. Қазір зауыт Мұнайлы мен Қарақия аудандарынан бөлек, Ақтау қаласына да қосымша 17 мың текше метр ауызсу беріп отыр, — дейді Каспий су тұщыту зауытының директоры Серік Гусман.

Зауыттың өндіріс көлемін алдағы уақытта тәулігіне 100 мың текше метрге дейін жеткізу көзделген. Ол үшін модернизация жұмыстарының келесі кезеңінде тәулігіне 60 мың текше метр су тұщытатын тағы бір нысан салу жоспарланып отыр. Соның биыл жобалық-сметалық құжаттарын әзірлеу жұмыстары басталмақ.

Бұған дейін Ақтауда ауызсу тапшылығы болып, Каспий су тұщыту зауытын кеңейту жұмыстары аяқталмай жатқаны туралы жазған болатынбыз.