Ақтөбе қаласында 18 көше мен бір тұрғын алап атауы өзгереді

АҚТӨБЕ. KAZINFORM – Ақтөбеде көшелердің ескі атауы қазақшаланады. Ашық НҚА порталына Ақтөбе облысы әкімдігінің бірлескен қаулысы және облыстық мәслихаттың шешімі шықты.

Ақтөбе қаласының кейбір құрамдас бөліктерін қайта атау туралы шешімде Алматы және Астана аудандарына қарасты тұрғын алап пен көшелер көрсетілген. Республикалық ономастика комиссиясының қорытындысы алынды. Сөйтіп идеологиялық тұрғыда ескірген 19 атаудың тізімі жасалды. Оның 18-і көше, біреуі тұрғын алап атауы. Қаулы мен шешім Ашық НҚА порталында 4 сәуірге дейін талқыланады.

Алматы ауданы бойынша:

«Белогорка» тұрғын үй алабын – «Құндызды» тұрғын үй алабы;

Кирпичный көшесін – Роза Бағланова көшесі;

Вагонный көшесін – Байғазы көшесі;

Комсомольский көшесін – Ақтерек көшесі;

Квартал энергетиков көшесін – Қазығұрт көшесі;

Цветочный көшесін – Ырысты көшесі;

Октябрьский көшесін – Сафуан Шаймерденов көшесі;

Нахимов көшесін – Тоқтамыс хан көшесі;

Қандыағаш көшесін – Зеренді көшесі;

Можайский көшесін – Сарыбұлақ көшесі;

«Астана» ауданы бойынша:

Новаторов көшесін – Манартау көшесі;

Станционный көшесін – Сырбай Мәуленов көшесі;

Холмогорский көшесін – Тоқмансай көшесі;

Мир даңғылын – Бейбітшілік даңғылы;

Новый көшесін – Ораз Жандосов көшесі;

Садовый көшесін – Айнабұлақ көшесі;

Хмельницкий көшесін – Сертай Кенжалин көшесі;

Лачугин көшесін – Сарыкөл көшесі;

Местпром тұйық көшесін – Әбу Сәрсенбаев тұйық көшесі деп өзгерту ұсынылған.

Айта кетейік, Ақтөбе облысында Первомайка және Болгарка ауылдарының атауы қазақшаланады. Сонымен бірге 29 көшеге қайта атау беріледі.