Ақтөбе мен Қызылорда облыстарының тауар өндірушілері кездесті

ҚЫЗЫЛОРДА. ҚазАқпарат - Бүгін Қызылордада Ақтөбе облысының күндері өтуде. Осы орайда облыстық кәсіпкерлер палатасы мен облыстық кәсіпкерлік және туризм, облыстық индустриялық-инновациялық даму басқармаларының ұйымдастыруымен екі облыстың тауар өндіруші кәсіпорындары арасында семинар кеңес өтті, деп хабарлады ҚазАқпарат тілшісі облыстық әкімдікке сілтеме жасап.

  
Жиынға, Қызылорда облыстық кәсіпкерлік палатасының директоры Ғалымбек Жақсылықов, облыстық индустриялық-инновациялық даму басқармасы бастығының орынбасары Еламан Жолмырза, сондай-ақ ақтөбелік кәсіпорын басшылары мен серіктестік өкілдері қатысты. 

Кездесу екі жақты қарым қатынасты одан әрі дамытып, тауар айналымын ұлғайту мақсатында ұйымдастырылған. Жиын барысында Ақтөбе облысының тауар өндіруші кәсіпорындары өздерінің өндіретін өнімдерін кеңінен насихаттап, жергілікті кәсіпорындарға таныстырды.