Ақтөбе облысында енді жүк пен адамдарды понтон көпір арқылы тасымалдайды
АҚТӨБЕ. KAZINFORM - Ақтөбе облысы Ойыл ауданының орталығында енді жүк пен адамдарды понтон көпір арқылы тасымалдайды. Бұған дейін тек әскери оқу-жаттығуда пайдаланған жылжымалы көпір бірнеше ай Ойыл халқын облыс орталығы, ауылдармен байланыстырады.
Ақтөбе облысы Ойыл ауданына понтон көпірді Қорғаныс министрлігі берді. Еліміздің Төтенше жағдайлар министрлігі 16 мың халқы бар ауданның қатынасы күрт үзілгенде ұсыныс айтып, 50 сағатта техника мен әскерилер Ақтөбеге жетті.
«Ойылда 16 мың адам тұрады. Ал мұндағы көпірді су шайды. Халықтың қатынасы қиындық тудырды. ТЖМ Қорғаныс министрдігіне понтон көпір бар екенін айтып, көмек сұрады. Олар қолдап, Ақтөбеге жіберді. Жүк 50 сағатта жетті. «Қазақстан темір жолы» ҰК 10 платформа, бір вагон берді. Жол жөнделгенше, көпір қалпына келгенше понтон көпір осында болады. Мұндай шешім елімізде бірінші рет қабылданған. Қорғаныс министрлігіне рақмет айтқым келеді. Понтон көпір бірнеше жеңіл көлікті тасымалдай алады. Сағат сайын жүреді. Бірінде тақ, бірінде жұп», - деді ҚР ТЖ вице-министрі Серік Төленбергенов.
Понтон көпір еліміз бойынша 58012 әскери бөлімінде ғана бар. Бұған дейін тек әскери оқу-жаттығуда қолданылды.
«3 сәуір күні понтондық көпір батальонының жеке құрамы жедел жұмылдырылды. Су тасқынынан зардап шеккен Ойыл ауданына келдік. Қазір Ойыл өзенінде 60 тонналық понтондық көпір бар. Гуманитарлық көмек, жеке құрамды тасымалдауға керек. Біз 2 күнде келдік. 15 қызметкер, 8 әскери техника бар. Әр жылдары әртүрлі оқу-жаттығуда пайдаландық. Понтондық көпір Қазақстан бойынша 58012 әскери бөлімінде ғана бар. Бұл жолы халыққа көмек көрсету үшін Ақтөбе облысына әкеліп тұрмыз», - деді 58012 әскери бөлім командирінің техникалық жөнінде орынбасары Тұяқбаев.
Ақтөбе облысы Ойыл ауданының орталығы қазір су қоршауында тұр. Облыс орталығына қатынайтын жолды су шайған, көпір апатты күйге түскен.
«Біз осы жылжымалы көпірді жол салып болғанша пайдаланамыз. Осылайша қатынасты қамтамасыз ете аламыз. Себебі ауданға кіреберіс жолдың 350 метрін шайып кеткен. Ендігі міндет – сол жолды жөндеу. Сонымен бірге кіреберісте 300 метр көпір бар. Көпір де апатты жағдайда тұр. Оны қарауға жобалық институт қызметкерлері келді. Техникалық қорытынды алған соң құжаттама жасалады. Су тасқыны кезінде 300 метр көпірдің екі тіреуі сыр берген. Бүгінде бір бөлігі пайдаға аспай қалды. Техникалық жағдайы туралы қорытынды алған соң көпірді түгел қайта салатынымыз немесе жалғайтынымыз белгілі болады», - деді Ақтөбе облыстық жолаушылар көлігі және автомобиль жолдары басқармасының басшысы Айбек Қайыр.
Еске салсақ, Ойылда биыл 24 наурызжа жергілікті деңгейде төтенше жағдай жарияланды.
