Ақтөбе облысында жоғалған ер азамат аман-есен табылды

АҚТӨБЕ. KAZINFORM – ТЖМ баспасөз қызметі Ақтөбе облысында жоғалған ер азаматтың аман-есен табылғанын мәлімдеді.

Дерекке қарағанда, Әйтеке би ауданындағы Т.Жүргенов ауылының құтқару қызметіне ер адам қоңырау шалып, 1991 жылғы туысының түскі уақытта жылқы іздеп кеткенін хабарлаған.

Ол содан оралмай, хабарсыз кеткен.

Іздестіру-құтқару жұмыстарына ТЖМ күштері, полиция қызметкерлері және хабар беруші шықты.

- Іздестіру-құтқару жұмыстарының нәтижесінде 1991 жылғы ер азамат «Қамқа» қыстағынан аман-есен табылды. Медициналық көмекке мұқтаж болмаған ер адам жол іздеп, адасып кеткендігі анықталды. Сонымен қатар ол құтқарушыларға өз алғысын білдірді, - деп жазды ведомстводан.

Бұған дейін Ақтөбе облысында көліктері бұзылып, жолда қалған төрт Тәжікстан азаматы құтқарылған.