Ақтөбеде 21 жастағы жігіттің екі IРhone телефонын тартып алған
Қалалық полиция бөліміне 21 жастағы жергілікті тұрғын хабарласты. Ол 4 қазанда сағат 15:30-да қаланың орталық көшесінің бірінде белгісіз біреудің күш қолданып, Iphone 12 Pro және Iphone 12 Mini маркалы екі жаңа ұялы телефонын тартып алған айтты. Шығын шамамен 1 млн теңге.
«Полиция күдіктіні тапты. Ол 22 жастағы жергілікті тұрғын болып шықты. Күдікті смартфондарды белгісіз біреуге сатқан. Қазіргі уақытта Қылмыстық кодекстің «Тонау» бабы бойынша сотқа дейінгі іс жүргізіліп жатыр», - деді облыстық ПД баспасөз қызметінің жетекшісі Ерболат Сарқұлов.
Осы баптың санкциясы бойынша мүлкі тәркіленіп немесе 1 мың айлық есептік көрсеткішке дейінгі мөлшерде айыппұл салынуы мүмкін. Тіпті түзеу жұмыстарына немесе бір мың сағатқа дейінгі мерзімге қоғамдық жұмыстарға тарту, сондай-ақ төрт жылға дейінгі мерзімге бас бостандығын шектеу не сол мерзімге бас бостандығынан айыру жазасы қарастырылған.