Ақтөбеде ауыл әкіміне үміткерлердің орташа жасы - 40 жас
АҚТӨБЕ. ҚазАқпарат – Ақтөбеде 35 ауыл әкімі сайланады. Қазіргі кезде 111 адамның өтініші қабылданды, деп хабарлайды ҚазАқпарат тілшісі.
Ақтөбе облысы бойынша кандидаттарды тіркеу жұмысы жалғасып жатыр. Бүгінде аумақтық сайлау комиссиялары 111 адамның өтінішін қабылдап үлгерді. Оның 64-і партия, 47-і өзін-өзі ұсынды.
«Орта есеппен әрбір округке 3-4 адамнан келіп тұр. Мәселен, Қобда ауданындағы бір округте 4, Шалқар ауданында 5 адам кандидат ретінде тіркелді. Барлығы 111 адамның 71-нің құжаты заң талаптарына сай келді. Өзгесі әлі тексеріліп жатыр. Тағы бір қызықты мәлімет, әкім болуға ниетті үміткерлердің 43-і сол округте тұрады. Өзгесі басқа ауыл, аудан, қаладан. Ер адам көп. Кандидаттардың 95-і ер адам болса, өзгесі әйел», - деді облыстық сайлау комиссиясының төрайымы Гүлнәр Күнбаева.
Жас ерекшелігі де әртүрлі. 25-29 жас аралығындағы үміткерлер саны – 11. Ал 30-35 аралығындағы кандидаттар қатары – 32, 36-40 жас аралығында 18, 41-45 жас аралығында 15, 46-50 жас аралығында 19 үміткер бар. Ал 51-55 жас аралығындағылар саны 7, 56-60 жасқа дейінгі кандидат қатары - 8, 61-63 жасқа дейінгі бір үміткер тіркелді.
«Үміткерлердің орташа жасы – 40 жас. Тең жартысына жуығының педагогикалық білімі бар. Экономист, заңгер, инженер, фермерлер бар. Олардың 62-і мемлекеттік қызметкер болса, 28-і бюджеттік саладан. Қазіргі әкімдердің 10-ы да қайта сайлауға түсуге ниетті. Кандидаттардың екеуі жұмыссыз», - деді Гүлнәр Күнбаева.
