Ақтөбеде ауыл маңындағы өртті сөндіруге пойыздың көмегі қажет болды
АҚТӨБЕ. ҚазАқпарат - Ақтөбеде Шұбарқұдық ауылының маңы мен теміржол бойындағы құрғақ шөп өртенді. Өртті сөндіруге арнайы мамандар мен пойыз жіберілді, деп хабарлайды ҚазАқпарат тілшісі.
Ақтөбеде күн қатты ысып, ауыл маңынан өрт шықты. Өрт сөндірушілер түні бойы қызыл жалынды өшірді.
«Темір ауданы, Шұбарқұдық ауылынан 12 шақырым қашықтықта, Ақтөбе-Атырау темір жолы және орман көшеттері бойындағы құрғақ шөп жанды. №13 өрт сөндіру бөлімінің жеке құрамынан 6 адам, 1 автокөлік, Шұбарқұдық ауылдық округінің еріктілерінен 24 адам, 5 автокөлік, Ақсайдан 7 адам, 1 техника, Кеңестудан 10 адам, 2 техника, Шұбарқұдық станциясынан 1 өрт сөндіру пойызы және 14 адам жіберілді. Бүгін сағат 02:55-те өрт сөндірілді. Барлығы аудан әкімдігінің бақылауында»,- деп хабарлады облыстық ТЖД баспасөз қызметі.
